Бош прокуратурада Латвия Республикаси Сейм аъзоси Инесе Воика билан коррупцияга қарши курашиш масалалари бўйича учрашув бўлиб ўтди.
Учрашувда Бош прокуратуранинг коррупцияга қарши курашиш соҳасидаги чора-тадбирларни мувофиқлаштириш бошқармаси, Бош прокуратура Академиясининг коррупцияга қарши курашиш илмий-таълим маркази раҳбарлари қатнашди.
Учрашув давомида И.Воика хонимга республикамизда олиб борилаётган коррупцияга қарши курашиш борасидаги ислоҳотлар тўғрисида маълумот берилди.
Хусусан, 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси, “Коррупцияга қарши курашиш тўғрисида”ги Қонун, 2019-2020 йилларда коррупцияга қарши курашиш Давлат дастури ижроси ва бошқалар ҳақида алоҳида тўхталиб ўтилди.
Ўз навбатида, Инесе Воика хоним Ўзбекистонда сўнги йилларда коррупцияга қарши курашиш борасида олиб борилаётган ислоҳотларни юқори баҳолаб, The Economist журнали томонидан Ўзбекистон 2019 йилда “Йил мамлакати” деб эълон қилинганлигини ҳам алоҳида таъкидлаб ўтди.
Учрашув якунида Латвия Республикаси билан коррупцияга қарши курашиш борасида ўзаро ҳамкорлик ва тажриба алмашиш масалалари муҳокама қилинди.
