Ўзбекистонда Киберхавфсизлик тўғрисида қонун ишлаб чиқилади

2020–2023 йилларга мўлжалланган киберхавфсизликка доир миллий стратегия ва “Киберхавфсизлик тўғрисида”ги қонун лойиҳаси ишлаб чиқилади. Бу ҳақда “Илм, маърифат ва рақамли иқтисодиётни ривожлантириш йили”да амалга оширишга оид давлат дастури тўғрисида”ги Ўзбекистон Республикаси Президенти Фармони лойиҳаси ва 2020 йил Давлат дастури лойиҳасида қайд этилган.
Ҳужжатга асосан хавфсизликни, миллатлараро тотувлик ва диний бағрикенгликни таъминлаш, шунингдек, ташқи сиёсат соҳасида:
2020 йил 1 сентябрга қадар киберхавфсизликнинг ҳуқуқий асосларини шакллантириш бўйича чоралар кўрилади, шу жумладан 2020–2023 йилларга мўлжалланган киберхавфсизликка доир миллий стратегия ва “Киберхавфсизлик тўғрисида”ги қонун лойиҳаси ишлаб чиқилади;
2020 йилда БМТнинг Инсон ҳуқуқлари бўйича кенгашига 2021–2023 йилларга сайланиш учун Ўзбекистон номзоди илгари сурилади;
2020 йил 20 сентябрда Самарқанд шаҳрида Инсон ҳуқуқлари бўйича Иккинчи Осиё форуми ўтказилади;
2020 йилда “Дўстлик ҳафталиги” ва “Дўстлик” халқаро форум-фестивали ўтказилади.